Міжнародны кангрэс даследчыкаў Беларусі - штогадовае акадэмічнае мерапрыемства, якое звычайна праводзіцца ў Коўне. Адна з найважнейшых задач Кангрэса – ўмацаванне інтэграцыі даследчыкаў і экспертаў у палітычных, сацыяльных і гуманітарных навуках. Кангрэс спрыяе лепшаму разуменню Беларусі ў акадэмічнай і грамадскай сферах у рэгіянальным і сусветным кантэксце. 

 

Кангрэс - адзінае месца ў свеце, дзе з 2011 года найбольш прадстаўнічая частка беларускіх акадэмічных і грамадскіх элітаў можа свабодна і незалежна ад уплыву беларускай і іншых дзяржаў абмяркоўваць гісторыю, палітыку, грамадства і культуру Беларусі. 

​

Ініцыятарамі і галоўнымі арганізатарамі Кангрэса з'яўляюцца Інстытут палітычных даследаванняў "Палітычная сфера" і Інстытут Вялікага Княства Літоўскага. У залежнасці ад сітуацыі, да аргкамітэта далучаюцца розныя беларускія, літоўскія, польскія, нямецкія, а таксама арганізацыі з іншых краін: Універсітэт Вітаўта Вялікага (Vytautas Magnus university), Еўрапейскі гуманітарны ўніверсітэт, Віленскі ўніверсітэт, Варшаўскі ўніверсітэт,  Універсітэт ім. Гумбальта ў Берліне (Humboldt-Universität zu Berlin), Colegium Civitas (Варшава), газета “Наша ніва”, Мінскі дыялог, Літоўскі інстытут гісторыі і інш. Кангрэса падтрымліваюць Konrad Adenauer Stiftung, The German Marshall Fund, Літоўскае міністэрства замежных спраў і іншыя арганізацыі.

 

Кангрэс запланаваны на 2027 год у Варшаве. Іншыя кангрэсы: Берлін 2025, Гданьск 2023, Коўна 2022, Коўна 2021, папярэднія кангрэсы. У кангрэсах штораз бяруць удзел да 700 навукоўцаў, журналістаў, грамадскіх дзеячаў, студэнтаў не толькі з Беларусі, Літвы, Польшчы і Украіны, але і з іншых еўрапейскіх дзяржаў, а таксама з Паўночнай Амерыкі і іншых краін. 

 

Гэта навуковае мерапрыемства, адрасаванае не толькі акадэмічнай, але і больш шырокай грамадскасці. На кангрэсах абмяркоўваюцца тэмы з розных галінаў навуковай веды: паліталогіі, сацыялогіі, гісторыі, рэлігіі, філалогіі і іншых. Праца Кангрэса уключае не толькі вузкія навуковыя секцыі, але і публічныя дыскусіі, а таксама культурныя мерапрыемствы.

​

***

​

Працоўнымі мовамі Кангрэса з'яўляюцца беларуская, украінская, англійская, літоўская, польская, нямецкая і руская. Іх выкарыстанне залежыць ад складу ўдзельнікаў панэлі; кожны мадэратар вырашае моўную палітыку ў сваёй панэлі. Назва, выдзеленая тлустым шрыфтам у праграме Кангрэса, пазначае мову дакладу. Пераклад не арганізаваны, за выключэннем адкрыцця і пленарнага пасяджэння ў першы дзень Кангрэса, калі магчымы сінхронны пераклад з беларускай на англійскую і наадварот.

​